सातामा दुई दिन बिदा: परिणाममुखी र प्रभावकारी रहेको सरकारको दाबी

काठमाडौं/साउन २८ गते । सरकारले हप्तामा दुई दिन सार्वजनिक बिदा दिने हालको व्यवस्थालाई तत्काल पुनरावलोकन नगर्ने स्पष्ट पारेको छ।

बिहीबार राष्ट्रिय सभाको बैठकमा सांसदहरूले उठाएका प्रश्नको जवाफ दिँदै कानून, न्याय तथा संसदीय मामिला मन्त्री सोविता गौतमले यो व्यवस्था कायमै रहने बताएकी हुन्। अन्तर्राष्ट्रिय अभ्यास र मुलुकको आन्तरिक आवश्यकतालाई ध्यानमा राखेरै दुई दिने बिदा प्रणाली लागू गरिएको उनको भनाइ थियो।

यसअघि बैठकमा सांसद विष्णुबहादुर विश्वकर्माले सातामा दुई दिन बिदा दिने निर्णयलाई ‘असफल विधि’को संज्ञा दिएका थिए। दुई दिनको बिदाका कारण शिक्षा, व्यापार र सरकारी सेवा प्रवाहमा गम्भीर असर परेको दाबी गर्दै उनले यो निर्णय खारेज गरी पुनः साताको एक दिन मात्र बिदा दिने साविककै व्यवस्थामा फर्किन सरकारसँग माग गरेका थिए।

सांसद्को प्रश्नको प्रतिवाद गर्दै मन्त्री गौतमले भने तत्कालीन समयमा इन्धन आपूर्तिमा देखिएको असहजताका कारण खपत घटाउन र सार्वजनिक प्रशासनलाई परिणाममुखी बनाउन २०८२ चैत २३ गतेदेखि यो व्यवस्था कार्यान्वयनमा ल्याइएको स्मरण गराइन्।

मन्त्री गौतमका अनुसार यो व्यवस्थाले सोचेभन्दा सकारात्मक नतिजा दिएको छ। “कर्मचारीको कार्य–जीवन सन्तुलन मिलाउन, ऊर्जा तथा प्रशासनिक खर्चमा मितव्ययिता कायम गर्न र आन्तरिक पर्यटन प्रवर्द्धन गरी आर्थिक गतिविधि चलायमान बनाउन यो व्यवस्था प्रभावकारी देखिएको छ,” उनले भनिन्।

त्यस्तै, बिहान ९ बजेदेखि नै कार्यालय खुल्ने प्रावधानले एकातिर सेवाग्राहीलाई सहजता भएको छ भने अर्कोतिर कर्मचारीको मनोबल र कार्यक्षमतामा समेत सकारात्मक प्रभाव परेको मन्त्री गौतमको दाबी छ।