विष्णु पौडेलको रिटमा भट्ट र अग्रवालको सम्पत्ति शुद्धीकरण मुद्दाको मिसिल झिकाउन सर्वोच्चको आदेश

काठमाडौं/असार १६ गते। सर्वोच्च अदालतले नेकपा एमालेका उपाध्यक्ष तथा पूर्वउपप्रधानमन्त्री विष्णु पौडेलसँग जोडिएको बन्दीप्रत्यक्षीकरण रिटमा गम्भीर चासो देखाउँदै विशेष अदालतमा विचाराधीन सम्पत्ति शुद्धीकरण मुद्दाको सक्कल मिसिल झिकाउन आदेश दिएको छ।

न्यायाधीशद्वय टेकप्रसाद ढुङ्गाना र मेघराज पोखरेलको इजलासले उक्त आदेश जारी गरेको हो। पौडेलकी पत्नी दोमाया पौडेलले दायर गरेको बन्दीप्रत्यक्षीकरणको रिटमाथि सुनुवाइ गर्दै अदालतले सुलभ अग्रवाल र दीपक भट्ट प्रतिवादी रहेको सम्पत्ति शुद्धीकरण मुद्दाका सम्पूर्ण तथ्य र प्रमाणहरूको विस्तृत अध्ययनका लागि मिसिल मगाउने निर्णय गरेको छ।

अदालतको आदेशअनुसार विशेष अदालतबाट आउने मिसिलमा रहेका कागजात, प्रमाण र मुद्दासँग सम्बन्धित अन्य विवरणहरूको गहन अध्ययनपश्चात् मात्र रिटमाथिको थप सुनुवाइ प्रक्रिया अघि बढ्नेछ।

विशेष अदालतमा विचाराधीन रहेको उक्त मुद्दा र बन्दीप्रत्यक्षीकरणको रिट निवेदनमा उठाइएका विषयहरू अन्तरसम्बन्धित रहेको निष्कर्ष निकाल्दै सर्वोच्चले न्यायिक निरूपणका लागि सक्कल फाइल नै आवश्यक रहेको ठहर गरेको हो।