धनुषा/फागुन २६ गते । ११६ औँ अन्तर्राष्ट्रिय महिला दिवसको अवसरमा जनकपुरधाममा एक दिवसीय अन्तरक्रिया कार्यक्रम सम्पन्न भएको छ।
COCAP को समन्वय तथा साथ साथ सिकाई संजाल धनुषाको आयोजनामा मंगलबार जनकपुरधाम उद्योग वाणिज्य संघको सभाहलमा “सबै महिला र बालबालिकाका लागि अधिकार, न्याय र अवसर” विषयमा अन्तरक्रिया कार्यक्रम आयोजना गरिएको हो।
कार्यक्रममा महिला तथा बालबालिकाको अधिकार सुनिश्चितता, समान अवसरको पहुँच, सामाजिक न्याय र महिला सशक्तीकरणका विषयमा छलफल गरिएको थियो। सहभागीहरूले महिला र बालबालिकाको हक अधिकार संरक्षणका लागि राज्य तथा स्थानीय तहले प्रभावकारी नीति र कार्यक्रम ल्याउनुपर्ने आवश्यकता औंल्याएका थिए।
साथ साथ सिकाई संजाल धनुषाकी अध्यक्ष रिंकु साहले कार्यक्रमको उद्देश्य महिला तथा बालबालिकाको अधिकार, न्याय र अवसरका विषयमा सरोकारवालाबीच संवाद तथा सहकार्य बढाउनु रहेको बताइन्। उनले समाजमा महिला र बालबालिकामाथि हुने विभेद अन्त्य गर्न सबै पक्षको संयुक्त प्रयास आवश्यक रहेको उल्लेख गरिन्।
कार्यक्रमको अध्यक्षता साथ साथ सिकाई संजाल धनुषाकी अध्यक्ष रिंकु साहले गरेकी थिइन्। भने कार्यक्रमको संचालन फेडो को सरस्वती मण्डलले संचालन गरेकी थिईन । कार्यक्रममा साथ साथ सिकाई संजाल धनुषाका सदस्यहरू, दलित महिला संघ (फेडो) का प्रतिनिधि सरस्वती मण्डल, ओरेक धनुषाकी प्रतिनिधि शुभद्रा आले, महिला अधिकारकर्मीहरू, विभिन्न संघ–संस्थाका प्रतिनिधिहरू तथा सरोकारवालाहरूको उल्लेख्य उपस्थिति रहेको थियो।
अन्तरक्रिया कार्यक्रममा सहभागीहरूले महिला तथा बालबालिकाको अधिकार संरक्षण, लैङ्गिक समानता र सामाजिक समावेशीतालाई बलियो बनाउन यस्ता कार्यक्रमले महत्वपूर्ण भूमिका खेल्ने विश्वास व्यक्त गरेका थिए।
Discussion about this post