मधेस प्रदेशको सभामुख रामअशिष यादव भए यस वर्षको ‘महामुर्ख’

धनुषा । जनकपुरधाममा होली पर्वको अवसरमा आयोजना हुने महामुर्ख सम्मेलनमा यस वर्ष महामुर्खको उपाधी मधेसका सभामुख रामअशिष यादवलाई प्रदान गरिएको छ ।

महामुर्खको उपाधी पाएपछि सभामुख यादवको अनुहारमा अनौठो मुस्कान समेत देखियो । उनलाई प्रशस्ती पत्र, तरुलको मालाले सुशोभित गरी सम्मान गरियो ।

सम्मेलनमा राकेश कर्णलाई वैशाखानन्द, विभा झालाई तिलबिखनी, विपिनकुमार झा लबरसटका, हिमांशु चौधरी जी हजुरी, दिगम्बर झा दिनमणि पोंगा पण्डित, विश्वलाल सिंह पटमुर्ख, अञ्जु पाण्डे मनतोरिया, विजय राउत विषखोपरा, प्रदीप चौधरी तरघुस्का, पवन कर्ण बज्रकिट, पवन ठाकुर डपोरशंख, विपिन पाठक डपोरशंख, राजकुमारी मण्डल तरघुस्की, लव अधिकारी लोढाशंकर र संचारकर्मी दीपक कर्णलाई लम्बोदरको उपाधी प्रदान गर्दै सम्मान गरिएको थियो ।

सो सम्मेलनमा सहभागी कविहरुले आ–आफ्नो कविताको माध्यले विभिन्न विषयवस्तु माथि कटाक्ष समेत गरेका थिए । वि.सं. २०६१ सालदेखि सुरु भएको महामूर्ख सम्मेलनमा विगतमा उपाधि पाउनेहरूमा मैथिली कवि नरेश ठाकुर , तत्कालीन नेकपा एमालेका नेता शीतल झा , तत्कालीन जनकपुर नगरपालिकाका मेयर हरिबहादुर बिसी , तत्कालीन सदभावना पार्टीका नेता ओमकुमार झा , वरिष्ठ साहित्यकार डा. राजेन्द्र विमल (२०६५), पूर्वमन्त्री रामचन्द्र झा, नेपालका चर्चित राजनीतिक विश्लेषक सिके लाल, साहित्यकार रामभरोष कापडि भ्रमर , नेपाली काँग्रेसका नेता रामसरोज यादव , डा. विजयकुमार सिंह , नेकपा एकिकृत समाजवादी पार्टीका नेता शत्रुधन महतो , आधुनिक स्वर्गद्वार निर्माणकर्ता पवन सिंघानीया , तमलोपाका अध्यक्ष वृषेशचन्द्र लाल , जनकपुरधाम उपमहानगरपालिकाका पूर्वमेयर लालकिशोर साह मधेशका पूर्व मुख्यमन्त्री लालबाबु राउत , महजोडी मदन कृष्ण श्रेष्ठ तथा हरिवंश आचार्य, अर्थविद् डा. भोगेन्द्र झा , जनकपुरधाम उपमहानगरपालिकाका मेयर मनोजकुमार साह , मधेसका पूर्व सभामुख रामचन्द्र मण्डल र मधेसका पूर्व मुख्यमन्त्री सतिश कुमार सिंहलाई महामूर्खको उपाधि प्रदान गरिएको थियो ।