जनकपुरधाम/माघ ९ गते। धनुषाको लक्ष्मीनिया गाउँपालिका वडा नं. २ मा अवस्थित दूधमती श्मशान घाटमा सरसफाइ, विकास तथा व्यवस्थापनसम्बन्धी कार्य तीव्र गतिमा अघि बढिरहेको छ। लामो समयदेखि उपेक्षित अवस्थामा रहेको श्मशान घाटलाई व्यवस्थित, स्वच्छ र मर्यादित बनाउने उद्देश्यसहित स्थानीय तहको पहलमा सुधार अभियान सञ्चालनमा ल्याइएको हो।
वडा नं. २ का अध्यक्ष लालजी साहको सक्रिय नेतृत्व तथा माँ राजदेवी समाज संरक्षण समितिका अध्यक्ष अजय यादवको अगुवाइमा श्मशान घाटको विकास र सरसफाइ कार्य अघि बढाइएको छ। सोहनी र सिनुरजोडा गाउँका युवाहरू तथा बुजुर्गहरूको सामूहिक सहभागिता र निरन्तर निगरानीमा अभियान प्रभावकारी रूपमा सञ्चालन भइरहेको छ।
स्थानीय युवाहरू स्वयं सडकमा उत्रिएर विकासको नेतृत्व गरिरहेका छन् भने स्थानीय नागरिकहरू श्रमदान तथा आर्थिक सहयोगमार्फत अभियानमा सक्रिय सहभागिता जनाइरहेका छन्। समुदायस्तरमै जिम्मेवारीबोधका साथ सुरु गरिएको यस पहलले दिगो विकास सामूहिक प्रयासबाट सम्भव हुने सशक्त उदाहरण प्रस्तुत गरेको स्थानीयवासीहरूले बताएका छन्।
यस अभियानले धार्मिक तथा सामाजिक महत्व बोकेको श्मशान घाटलाई व्यवस्थित बनाउनुका साथै समाजमा सकारात्मक सन्देश प्रवाह गरेको छ। “नेतृत्व सडकमा, विकास मैदानमा” भन्ने भावनालाई व्यवहारमा उतार्दै स्थानीय समुदायले अनुकरणीय काम गरेको सर्वत्र प्रशंसा भइरहेको छ।
Discussion about this post