जनकपुरधाम/माघ ८ गते। जिल्ला प्रशासन कार्यालय धनुषाले सरस्वती पूजाको अवसरमा सामाजिक विकृति फैलाउने कुनै पनि गतिविधि नगर्न सर्वसाधारणलाई कडा चेतावनी दिएको छ।
मधेस प्रदेशको मिथिला क्षेत्रमा बसन्त पञ्चमीका दिन परम्परागत रूपमा श्रद्धा र धुमधामका साथ सरस्वती पूजा मनाइँदै आएको उल्लेख गर्दै प्रशासनले धार्मिक तथा सांस्कृतिक मर्यादाविपरीतका गतिविधि नियन्त्रण गर्न विशेष सूचना जारी गरेको हो।
प्रशासनले सरस्वती पूजाको नाममा डिजे बजाउने, भोजभतेर गर्ने, मादक पदार्थ तथा अन्य नशालु पदार्थ सेवन गरी नाचगान गर्ने, जबरजस्ती अभिर लगाउने, होहल्ला गर्ने जस्ता अवाञ्छित क्रियाकलापहरू समाजमा नकारात्मक प्रभाव पार्ने भन्दै यस्ता गतिविधि नगर्न आग्रह गरेको छ।
जिल्ला प्रशासन कार्यालयले जारी सूचनाको उल्लङ्घन गरी अवाञ्छित गतिविधिमा संलग्न भएको पाइएमा प्रचलित कानुन बमोजिम कडा कारबाही गरिने स्पष्ट पारेको छ। साथै, सरस्वती पूजालाई शान्त, मर्यादित र सभ्य वातावरणमा सम्पन्न गर्न शान्ति, सुरक्षा तथा सामाजिक सद्भाव कायम राख्न सबै पक्षको सहयोग आवश्यक रहेको प्रशासनले जनाएको छ।
Discussion about this post