निष्पक्ष निर्वाचन सम्पन्न गर्न सुरक्षा निकाय गम्भीर हुन गृहमन्त्री अर्यालको निर्देशन

जनकपुरधाम/पुस २९ गते । गृहमन्त्री ओमप्रकाश अर्यालले आगामी फागुन २१ गते हुने प्रतिनिधिसभा निर्वाचनलाई निष्पक्ष, स्वतन्त्र र भयरहित रूपमा सम्पन्न गर्नु सुरक्षा निकायमा आबद्ध सबैको साझा दायित्व भएको बताउनुभएको छ।

सङ्घीय गृह मन्त्रालय तथा मधेस प्रदेश गृह, सञ्चार तथा कानुन मन्त्रालयद्वारा आज जनकपुरधाममा आयोजित प्रदेशस्तरीय सुरक्षा गोष्ठीमा बोल्दै गृहमन्त्री अर्यालले निष्पक्ष निर्वाचनका लागि सुरक्षा निकायका सबै अङ्गलाई गम्भीर र जिम्मेवार भएर आ–आफ्नो कार्यक्षेत्रमा परिचालित हुन निर्देशन दिनुभयो।

उहाँले निर्वाचन सफल बनाउन राजनीतिक दल, नागरिक समाज तथा सञ्चारकर्मीको भूमिकालाई महत्वपूर्ण रहेको उल्लेख गर्दै समाजमा द्वन्द्व फैलाउने कुनै पनि गतिविधि नगर्न सबै सम्बद्ध पक्षलाई आग्रह गर्नुभयो। प्रचलित कानुन विपरीतका कार्यमा संलग्न जो–कोहीलाई कानुनअनुसार कारबाही गरिने चेतावनी पनि उहाँले दिनुभयो। सामाजिक सञ्जालको दुरुपयोगप्रति लक्षित गर्दै गृहमन्त्री अर्यालले जिम्मेवार प्रयोग गर्न समेत आग्रह गर्नुभयो।

जेन–जीको चाहनाअनुसार वर्तमान सरकार गठन भएको उल्लेख गर्दै उहाँले सुशासन कायम गर्नु र निर्धारित मितिमा निर्वाचन सम्पन्न गराउनु सरकारको मुख्य कार्यादेश भएको स्पष्ट पार्नुभयो। राष्ट्रले सुम्पेको जिम्मेवारी उच्च मनोबलका साथ पूरा गर्न सुरक्षा निकायका पदाधिकारीलाई उहाँले निर्देशन दिनुभयो।

गृहमन्त्री अर्यालले लुटिएका हतियार फिर्ता भइरहेको जानकारी दिँदै शान्ति सुरक्षाको प्रत्याभूति गर्न नेपाल प्रहरी, सशस्त्र प्रहरी बल लगायतका सुरक्षा निकाय सीमित साधन र स्रोतका बाबजुद पनि निर्वाचन सफल बनाउन सक्रिय रूपमा लागिपरेको बताउनुभयो।