निजि अस्पतालका स्वास्थकर्मीहरु अस्पताल खाली गरी उत्रिए आन्दोलनमा

कार्तिक १६ गते। मधेश प्रदेशका निजी अस्पतालमा कार्यरत स्वास्थ्यकर्मीहरू विभिन्न मागसहित आन्दोलनमा उत्रिएका छन्। श्रमशोषण, असमान व्यवहार र दमन अन्त्यको माग गर्दै उनीहरूले पूर्वघोषित कार्यक्रमअनुसार शान्तिपूर्ण आन्दोलन सुरु गरेका हुन्।

स्वास्थ्यकर्मीहरूको मुख्य मागमा नेपाल सरकारको ऐनअनुसार तलब स्केल लागू गर्ने, सरकारी स्वास्थ्य संस्थाका करारकर्मीलाई हटाई लोक सेवा आयोगमार्फत विज्ञापन गर्ने, स्वास्थ्यकर्मीको बीमा र सुरक्षाको व्यवस्था गर्ने, र हप्तामा अधिकतम ४२ घण्टासम्म मात्र कामको सीमा तोक्ने लगायतका ८ सुत्रीय माग समावेश छन्।

आन्दोलनमा संलग्न स्वास्थ्यकर्मी ओम कापरीका अनुसार उनीहरू लामो समयदेखि न्यून तलब, असमान व्यवहार र असुरक्षित कार्य वातावरणमा काम गर्न बाध्य छन्। मन्त्रालयबाट पटक–पटक सूचना जारी भए पनि निजी अस्पतालहरूले त्यसको कार्यान्वयन नगरेको उनको आरोप छ।

“निजी अस्पतालहरूले सरकारी निर्देशन पालना नगरेपछि स्वास्थ्यकर्मीहरूको मनोबलमा गम्भीर असर परेको छ, त्यसैले हामी बाध्य भएर आन्दोलनमा उत्रिएका हौं,” कापरीले भने।

स्वास्थ्यकर्मीहरूले जिल्ला प्रशासन कार्यालय, श्रम मन्त्रालय, मुख्यमन्त्री कार्यालय र स्वास्थ्य मन्त्रालयको ध्यानाकर्षण गराइसके पनि हालसम्म कुनै ठोस पहल नभएको गुनासो गरेका छन्। उनीहरूले आन्दोलनका क्रममा बिरामी सेवामा असर परे त्यसको सम्पूर्ण जिम्मेवारी अस्पताल सञ्चालक र सम्बन्धित मन्त्रालयले लिनुपर्ने चेतावनी पनि दिएका छन्।