जनकपुरधाममा जिल्ला स्तरीय प्रथम वडा कप कराँते प्रतियोगिता सुरु

गिरिजानन्द साह/जनकपुरधाम/असार १२ गते। जनकपुरधाम उप–महानगरपालिका वडा नं. १४ को आयोजनामा जिल्ला स्तरीय प्रथम वडा कप कराँते प्रतियोगिता २०८२ सुरु भएको छ। नेपाल सोतोकान कराँते संघ धनुषाको सहकार्यमा सुरु भएको यो दुई दिवसीय प्रतियोगिता जनकपुरधामको श्रीराम जानकी बहुउद्देश्यीय अन्तर्राष्ट्रिय रंगशाला (वडा नं. १४) मा सञ्चालन भइरहेको छ। प्रतियोगिताको उद्घाटन मधेश प्रदेश सरकारका खेलकुद तथा समाज कल्याण मन्त्री माननीय प्रमोद जयसवालको प्रमुख आतिथ्यतामा सम्पन्न भयो। उद्घाटन समारोहको अध्यक्षता आयोजक वडा अध्यक्ष पुण्य प्रताप यादवले गरेका थिए।

मन्त्री प्रमोद जयसवालले आफ्नो सम्बोधनमा मधेश प्रदेशलाई ‘खेलाडीहरूको उर्वर भूमि’ को रूपमा चित्रित गर्दै खेल क्षेत्रमा आफूले अघि सारेका योजनाहरूको चर्चा गरे। उनले विगतमा थाँती रहेका कार्यहरूलाई आफ्नो कार्यकालमा अगाडि बढाउने प्रतिबद्धता व्यक्त गर्दै भने– “अडकिएको योजनाहरूलाई प्रक्रिया अनुसार लाईनमा ल्याएर कार्यान्वयनमा ल्याउनेछौं।” उनले जनकपुरधाममा निर्माणाधीन श्रीराम जानकी बहुउद्देश्यीय अन्तर्राष्ट्रिय रंगशालाको कामलाई मधेश प्रदेश सरकारले प्राथमिकताका साथ अगाडि बढाइरहेको बताए।

कार्यक्रममा विशिष्ट अतिथिका रूपमा मधेश खेलकुद परिषदका सदस्य सचिव शिवजी प्रसाद कानु, परिषदका सदस्य लव अधिकारी, जनकपुरधाम उपमहानगरपालिका वडा नं. ८ का वडा अध्यक्ष दिनेश सिंह लगायत उपस्थित थिए। साथै कार्यक्रममा वडा नं. १४ का वडा सदस्य गायत्री देवी धनकार, रमेश साह, राकेश पाठक, राज कुमार साह लगायत कराँते प्रशिक्षक, खेलाडी, पत्रकार तथा स्थानीय दर्शकहरूको उल्लेखनीय उपस्थिति रहेको थियो।

यो प्रतियोगितामा धनुषा जिल्लाभित्र सक्रिय कराँते संघ, संस्था, विद्यालय, क्लब र प्रशिक्षक–खेलाडीहरूको सहभागीता रहेको छ। आयोजकका अनुसार प्रतियोगिताको मूल उद्देश्य भनेको स्थानीय तहमा कराँते खेलको प्रवर्द्धन गर्नु र नवप्रतिभाहरूको पहिचान तथा प्रोत्साहन गर्नु रहेको छ। प्रतियोगिता दुई दिनसम्म सञ्चालन हुनेछ र अन्तिम दिन उत्कृष्ट प्रदर्शन गर्ने खेलाडी तथा समूहहरूलाई पुरस्कृत गरिने आयोजकले जानकारी दिएका छन्।