३०औँ राष्ट्रिय छन्द दिवसमा बहुभाषिक कविता वाचन, स्रष्टा सम्मान तथा छात्रवृत्ति वितरण कार्यक्रम सम्पन्न

बर्दिवास (महोत्तरी)/वैशाख ८ गते । शिशिर घिमिरे स्मृति प्रतिष्ठानको आयोजनामा ३०औँ राष्ट्रिय छन्द दिवसको अवसरमा एक विशेष साहित्यिक कार्यक्रम सम्पन्न भएको छ। प्रतिष्ठानका अध्यक्ष प्रेम घिमिरे ‘अग्नि कवच’को अध्यक्षता तथा प्रदेशसभा सदस्य शारदा थापाको प्रमुख आतिथ्यमा सम्पन्न उक्त कार्यक्रममा बहुभाषिक कविता वाचन, स्रष्टा सम्मान तथा छात्रवृत्ति वितरण जस्ता गतिविधिहरू गरिएको थियो।

कार्यक्रमको प्रमुख आकर्षणका रूपमा प्रा. डा. सुमन कर्माचार्यलाई “शिशिर घिमिरे स्मृति प्रतिभा सम्मान २०८१” प्रदान गरिएको थियो। उनलाई नगद रु १५,५५५ सहित सम्मानपत्रले सम्मानित गरिएको हो।

यसै अवसरमा जनवादी लेखक संघ सितामढी (भारत) का कोषाध्यक्ष महमद कामरुदिन नदाफले दुई विशेष क्षमताका विद्यार्थीहरू — गरिमा परियार र दिनेश महतो — लाई जनही रु ५५५५ बराबरको छात्रवृत्ति प्रदान गरे। साथै, साहित्यप्रेमी मिना देवकोटाद्वारा सुस्मिता कट्वाललाई रु २५५५ छात्रवृत्ति प्रदान गरिएको थियो।

सप्तरी, सिरहा, धनुषा, महोत्तरी, रौतहट, सर्लाही, सिन्धुली, रामेछाप, उदयपुरलगायत जिल्लाबाट आएका साहित्यकारहरूको उल्लेखनीय उपस्थिति रहेको कार्यक्रममा गीत, गजल र कविता वाचन गरिएको थियो। वाचन गर्ने सर्जकहरूमा कुमार कुसुम, गोपाल यादव, मेघराज पौडेल, डा. सुमन कर्माचार्य, बोध कुमार घिमिरे, डा. जो जोनसन, डा. जेनी हेरिङटन लगायत थिए।

सर्जकहरूलाई दिवंगत शिशिर घिमिरेकी आमा देवि घिमिरेबाट प्रशंसा पत्र प्रदान गरिएको थियो। कार्यक्रममा शारदा थापा, विष्णु खड्का, लम्बोदर काफ्ले लगायतले सम्बोधन गर्दै साहित्यिक योगदानको उच्च प्रशंसा गरे।

कार्यक्रमको संचालन नारद काफ्लेले गरेका थिए भने स्वागत मन्तव्य भीमकुमार राउतले दिएका थिए।

साहित्यिक चेतनाको अभिवृद्धि र नवप्रतिभाको प्रोत्साहन गर्ने उद्देश्यले आयोजना गरिएको यो कार्यक्रम सफल र प्रेरणादायी भएको सहभागिहरूले बताएका छन्।