गिरिजानन्द साह/वैशाख ३ गते। नेपाली समाज, संस्कृति, इतिहास र आत्माको गहिरो चित्रण गर्ने कृति “The Soul of Nepal” भोलि वैशाख ४ गते (बिहीबार) काठमाडौंको राष्ट्रिय सभा गृहमा विमोचन गरिने भएको छ। पुस्तकको विमोचन कार्यक्रम दिउँसो २:०० बजे सुरु हुनेछ।
यो महत्वपूर्ण कृति Youth Alliance for Development (YAD Nepal) का संस्थापक अध्यक्ष डा. महेश्वरी कुँवर द्वारा झण्डै ३ वर्षको गहिरो अध्ययन र अनुसन्धान पश्चात् तयार पारिएको हो। नेपाल र नेपालीको आत्माको गहिरो विश्लेषण, संस्कृति र पहिचानलाई विश्वसामु चिनाउने उद्देश्यले लेखिएको यस पुस्तकमा समावेश सामग्रीले पाठकमा गहिरो चेतना र सन्देश दिन अपेक्षा गरिएको छ।
पुस्तक विमोचन कार्यक्रममा प्रमुख अतिथि नेपाल सरकारका परराष्ट्र मन्त्री माननीय डा. आरजु राणा देउवा रहनेछिन्। साथै विशेष अतिथि रुपमा पर्यटन, संस्कृति तथा नागरिक उड्डयन मन्त्री श्री बद्री प्रसाद पाण्डे, सातवटै प्रदेशका मुख्यमन्त्रीहरु, वरिष्ठ सरकारी अधिकारीहरु, विभिन्न क्षेत्रमा योगदान दिएका विशिष्ट व्यक्तित्वहरुको उपस्थित रहने कार्यक्रम आयोजकले जनाएको छ।
कार्यक्रमको आयोजना YAD Nepal द्वारा गरिएको हो। संस्थाले एक औपचारिक प्रेस विज्ञप्ति जारी गर्दै सर्वसाधारण, लेखक, शोधकर्ता, युवा, तथा देशप्रेमी सबैलाई कार्यक्रममा उपस्थित भई पुस्तक विमोचनलाई सफल बनाउन हार्दिक अनुरोध गरेको छ।
पुस्तक “The Soul of Nepal” नेपाली चेतना, सम्पदा र सामाजिक यथार्थको प्रतिनिधि दस्तावेजको रुपमा स्थापित हुने अपेक्षा गरिएको छ।
Discussion about this post