बालकलाई अपहरण गरी लैजाँदै गर्दा सप्तरीका एकजना पक्राउ

फागुन २४ गते । सात वर्षीय एक बालकलाई अपहरण गरी लैजाँदै गर्दा एकजना पक्राउ परेका छन् ।
पक्राउ पर्नेमा सप्तरी काे धनपुरी बस्ने ३५ वर्षीय रामदेव ऋषिदेवलाई प्रहरीले पक्राउ गरी मुद्दा चलाएको हो। जिल्ला प्रहरी कार्यालय सुनसरीका अनुसार अपहरण गरेको १० घन्टाभित्र बालकको सकुशल उद्धार गरी आफन्तसमक्ष जिम्मा लगाइएको छ।

ऋषिदेवलाई प्रस्तावित इलाका प्रहरी कार्यालय रामधुनी, जिल्ला प्रहरी कार्यालय सुनसरी र इलाका प्रहरी कार्यालय पकली सुनसरीको संयुक्त टोलीले पक्राउ गरेको हो। फागुन २१ गते ‘सोमबार दिउँसो बालक अपहरण गरी हिँडाएर इटहरीतर्फ घुमाएर फेरि झुम्का (रामधुनी) नै ल्याएको अवस्थामा प्रहरीले राति १० बजे पक्राउ गरेको थियो’, इलाका प्रहरी कार्यालय पकलीका प्रहरी निरीक्षक केशव गौतमले भने, ‘बालक अपहरणपछि कुनै सवारी साधन प्रयोग नगरीकन रामधुनी आपपास दिनभर घुमाएको पाइयो।’

गोविन्द रामका छोरा फुच्छे भनेर चिनिने बालकलाई बजारमा खाजा खुवाई लोभ देखाएर अपहरण गरेको प्रहरीले जनाएको छ। ‘अपहरण गर्ने ऋषिदेवले बजारमा गोविन्दका सात वर्षका छोरा र ६ वर्षकी छोरी भेटाएपछि पैसा दिएको र चाउमिन खुवाएका रहेछन्’, प्रहरी निरीक्षक गौतमले भने, ‘खाजा खुवाएपछि बालककी बहिनीलाई घर पठाएर बालकलाई लिएर गएको रहस्य खुलेको छ।’

अपहरण गर्ने ऋषिदेव इँटाभट्टामा काम गर्ने मजदुर हुन्। अपहरणमा परेका बालक र अपहरण गर्ने ऋषिदेवबीच कुनै चिनजान छैन। अपहरणमा परेका बालकको परिवार मजदुर हुन्। बालक अपहरण गर्नुको कारणबारे प्रहरीले थप अनुसन्धान गरिरहेको बताए ।