सीटीईभीटीको परीक्षामा चिट चोर्न सघाएको आरोपमा ५ फोटोकपी संचालक जनकपुर बाट पक्राउ

जनकपुरधाम ।सीटीईभीटीको परीक्षामा परीक्षार्थीलाई चिट चोर्न सघाएको आरोपमा जनकपुरधामबाट प्रहरीले शुक्रबार पाँच जनालाई पक्राउ गरेको छ ।

जनकपुरधामस्थित एक परीक्षा केन्द्रमा अनुगमन गर्न खटिएको टोलीले परीक्षा हलमा अत्याधिक चिट फेला पारेपछि यसको अनुसन्धान गरिएको थियो । अनुसन्धानको क्रममा फोटोकपी गर्ने व्यक्तिले नै चिट तयार गरिदिने रहस्य खुलेको थियो । सोही अनुसन्धानको आधारमा जनकपुरधामको मुरली चोक र भैरव चोकबाट पाँच जना फोटोकपी गर्ने व्यक्तिलाई नियन्त्रणमा लिएको धनुषा प्रहरीका प्रबक्ता मकेन्द्रकुमार मिश्रले बताए ।

उनका अनुसार पक्राउ पर्नेमा जनकपुरधाम उपमहानगरपालिका-३ का रोहित गुप्ता, मनोज श्रेष्ठ, वडा नम्बर-४ का विजयकुमार साह, वडा नम्बर-५ का कौशलकिशोर साह र जयकुमार साह छन् ।

उनीहरुबाट २ थान ल्यापटप, १ थान मोवाईल र सानो चिट साईजको फोटोकपी बुकहरू ५ बोरा सहित बरामद गरिएको छ । पक्राउ परेकाहरुमाथि शिक्षा ऐन २०२८ को दफा १७ को १ (च) बमोजिमको कसुरमा ५ दिन म्यादथप गरी अनुसन्धान कार्य भई रहेको डीएसपी मिश्रले बताए ।

यसअघि जिल्ला प्रहरी कार्यालय धनुषाले सीटीईभीटीको पश्नपत्र आउट गर्ने ५ जना पक्राउ परेको गलत जानकारी दिएको थियो । पछि जिल्ला प्रहरी कार्यालय धनुषाले चिट तयार गरी बेच्ने फोटोकपी संचालक रहेको पुष्टि गरेको हो ।