पत्रकार प्रिमेश शिवाकोटीको निधन, रौतहटको सञ्चार क्षेत्र शोकमा

रौतहट/असार २९ गते। नेपाल प्रेस युनियन रौतहटका अध्यक्ष तथा अन्नपूर्ण पोस्ट दैनिकका रौतहट संवाददाता प्रिमेश शिवाकोटीको उपचारका क्रममा निधन भएको छ। उनी ३६ वर्षका थिए।

रौतहटको चन्द्रपुर नगरपालिका–७ निवासी शिवाकोटीको सोमबार बिहान चितवनस्थित सीएमसी अस्पतालमा निधन भएको हो। केही समययता मृगौलासम्बन्धी समस्याबाट पीडित उनी उपचारका लागि चितवनमा भर्ना भएका थिए। स्वास्थ्य अवस्थामा सुधार नआएपछि उपचारकै क्रममा उनको निधन भएको पारिवारिक स्रोतले जनाएको छ।

शिवाकोटी रौतहटमा क्रियाशील पत्रकारका रूपमा परिचित थिए। नेपाल प्रेस युनियन रौतहटका अध्यक्षको जिम्मेवारी सम्हाल्दै उनले अन्नपूर्ण पोस्ट दैनिकका रौतहट संवाददाताका रूपमा लामो समयदेखि पत्रकारिता गर्दै आएका थिए। उनी समाचार लेखनसँगै सामाजिक सरोकारका विषयमा पनि सक्रिय रहँदै आएका थिए।

उनको असामयिक निधनले रौतहटको पत्रकारिता क्षेत्रमा अपूरणीय क्षति पुगेको भन्दै पत्रकार, विभिन्न सञ्चार संस्था तथा शुभेच्छुकहरूले गहिरो दुःख व्यक्त गरेका छन्। दिवंगत शिवाकोटीका परिवारमा श्रीमती र एक छोरी छन्।