धनुषा/असार ९ गते । उच्च अदालत जनकपुरले मुद्दाको सुनुवाइ युट्युबमार्फत प्रत्यक्ष प्रसारण गर्ने व्यवस्था सुरु गरेको छ । अदालतले बन्द इजलासमा हुने सुनुवाइबाहेक अन्य सबै मुद्दाको बहस तथा सुनुवाइ प्रत्यक्ष प्रसारण गरिने जनाएको छ ।
नयाँ व्यवस्थाअन्तर्गत पहिलो दिन तीनवटा मुद्दाको सुनुवाइ अदालतको आधिकारिक युट्युब च्यानलमार्फत प्रत्यक्ष प्रसारण गरिएको छ । अदालतका अनुसार यस कदमले न्यायिक प्रक्रियालाई थप पारदर्शी, खुला र नागरिकमैत्री बनाउन सहयोग पुग्ने अपेक्षा गरिएको छ ।
उच्च अदालत जनकपुरले उपलब्ध प्रविधिको अधिकतम प्रयोग गर्दै नागरिकको कानुनी सूचनाको हक सुनिश्चित गर्न आफू प्रतिबद्ध रहेको जनाएको छ । यसअघि पनि अदालतले प्रविधिमैत्री सेवाको विस्तार गर्दै अनलाइन माध्यमबाट बहस गर्ने व्यवस्था लागू गरिसकेको थियो ।
सो व्यवस्थाअनुसार नेपालभित्र वा विदेशमा रहेका कानुन व्यवसायीहरूले भिडियो कन्फरेन्समार्फत मुद्दामा बहस गर्न सक्ने सुविधा पाएका छन् । त्यसका लागि अदालतका प्रत्येक इजलासमा एलईडी स्क्रिन, क्यामेरा तथा आवश्यक प्राविधिक उपकरण जडान गरिएको छ ।
अदालतले सूचना प्रविधिको प्रयोगमार्फत न्याय सेवामा पहुँच विस्तार, पारदर्शिता अभिवृद्धि तथा सेवाग्राहीलाई सहजता प्रदान गर्ने उद्देश्यले यस्ता प्रविधिमैत्री अभ्यासलाई निरन्तरता दिँदै आएको जनाएको छ ।
Discussion about this post