काठमाडौं । युथ एसोसिएसन अफ नेपाल (यान) ले अवैध खोला उत्खननविरुद्ध आवाज उठाउँदै ज्यान गुमाएका दिलिप महतोको छैठौं पुण्यतिथिको अवसरमा काठमाडौंको माइतीघर मण्डलामा श्रद्धाञ्जली कार्यक्रम सम्पन्न गरेको छ।
२०७६ साल पुस २५ गते सिरहाको औरही खोलामा भइरहेको अवैध उत्खनन रोक्न गएको बेला ओमप्रकाश महतो (दिलिप) लाई टिपरले किचेर हत्या गरिएको थियो। सो घटनापछि दिलिप महतोलाई ‘पहिलो पर्यावरण सहिद’ घोषणा गर्नुपर्ने मागसहित युथ एसोसिएसन अफ नेपाल विगत छ वर्षदेखि निरन्तर आवाज उठाउँदै आएको छ।
यानका केन्द्रीय महासचिव दीपक यादवको नेतृत्वमा सम्पन्न श्रद्धाञ्जली कार्यक्रममा नेपाल विद्यार्थी संघका केन्द्रीय अध्यक्ष दुजाङ शेर्पा, मधेस लाइब्रेरीका संरक्षक आभाष गुरु, ब्लड फर नेपालका सरोज महतो, कुश्वाहा समाजका केन्द्रीय अध्यक्ष राकेश सिंह, बिटु मिश्र, भोला भट्टराई, राज सिंघानियालगायत दर्जनौं युवाहरुको उपस्थिति रहेको थियो।
कार्यक्रममा सहभागी वक्ताहरूले दिलिप महतोको बलिदानलाई स्मरण गर्दै वातावरण संरक्षणका लागि ज्यान गुमाउने व्यक्तिलाई राज्यले सम्मान गर्नुपर्नेमा जोड दिए। उनीहरूले दिलिप महतोलाई औपचारिक रूपमा पहिलो पर्यावरण सहिद घोषणा गर्न तथा अवैध उत्खनन नियन्त्रणमा राज्य गम्भीर बन्नुपर्ने माग गरे।
उक्त अवसरमा दिलिप महतोकी बहिनी अध्यक्ष रहेको दिलिप महतो प्रतिष्ठानले पनि सोही स्थान र समयमा श्रद्धाञ्जली कार्यक्रम आयोजना गरेकाले दुबै संस्थाले संयुक्त रूपमा कार्यक्रम सम्पन्न गरेका थिए।
श्रद्धाञ्जली कार्यक्रममा दिलिप महतोप्रति सम्मान व्यक्त गर्दै वातावरणीय न्याय, दण्डहीनताको अन्त्य र प्राकृतिक स्रोतको संरक्षणका लागि एकजुट भएर संघर्ष जारी राख्ने प्रतिबद्धता व्यक्त गरिएको थियो।
Discussion about this post