शिक्षा नै समाज र राष्ट्र विकासको मेरुदण्ड हो : सभामुख रामअशिष यादव

जनकपुरधाम/पौष १९ गते। मधेश प्रदेश सभाका सभामुख रामअशिष यादवले शिक्षा नै समाज र राष्ट्रको समग्र विकासको मेरुदण्ड रहेको बताएका छन्। जनकपुरधामस्थित हिमाली बोर्डिङ स्कुलको ३४औँ वार्षिकोत्सवका अवसरमा आयोजित कार्यक्रममा सम्बोधन गर्दै उनले शिक्षाविना समृद्ध समाज निर्माण सम्भव नरहेको स्पष्ट पारे।

सभामुख यादवले विद्यालय तहबाटै अनुशासन, नैतिकता, सिर्जनशीलता र व्यवहारिक ज्ञानमा विशेष जोड दिनुपर्ने आवश्यकता औँल्याए। उनले शिक्षित जनशक्तिले मात्र समाजलाई सही दिशामा अघि बढाउन सक्ने उल्लेख गर्दै शिक्षकहरूको भूमिका अत्यन्त महत्वपूर्ण रहेको बताए। शिक्षकहरू नै समाज परिवर्तनका वास्तविक अभियन्ता भएको उनको भनाइ थियो।

उनले वार्षिकोत्सव केवल उत्सव मनाउने अवसर मात्र नभई विद्यालयका संस्थापक, शिक्षक र सरोकारवालाले शिक्षालाई अझ गुणस्तरीय, व्यवहारिक र प्रभावकारी कसरी बनाउने भन्ने विषयमा गम्भीर समीक्षा गर्ने अवसरसमेत भएको उल्लेख गरे।

कार्यक्रममा हिमाली बोर्डिङ स्कुलले विगत ३४ वर्षदेखि शिक्षा क्षेत्रमा पुर्‍याउँदै आएको योगदानको चर्चा गरिएको थियो। विद्यालयका प्रधानाध्यापक रमेश साहले गुणस्तरीय शिक्षाका लागि विद्यालयले अपनाउँदै आएको शैक्षिक नीति, कडा अनुशासन तथा अतिरिक्त क्रियाकलापबारे जानकारी गराए।

वार्षिकोत्सवका अवसरमा उत्कृष्ट शिक्षक तथा विद्यार्थीहरूलाई प्रमाणपत्र र सम्मानपत्र प्रदान गरी सम्मान गरिएको थियो। साथै रक्तदान कार्यक्रम, वक्तृत्वकला प्रतियोगिता लगायत विभिन्न कार्यक्रमहरूको समेत आयोजना गरिएको थियो।