प्रतिनिधिसभा चुनाव २०८२ : सशस्त्र प्रहरीको परिचालन नीति सार्वजनिक

मङ्सिर २६ गते। आगामी प्रतिनिधिसभा सदस्य निर्वाचन–२०८२ लाई लक्षित गर्दै सशस्त्र प्रहरी बल नेपालले व्यापक सुरक्षा परिचालन नीति सार्वजनिक गरेको छ।

निष्पक्ष, भयरहित र पारदर्शी वातावरणमा मतदान सम्पन्न गराउन सशस्त्र प्रहरीले गर्ने भूमिका, तालिम तथा संरचनागत तयारीसम्बन्धी विवरण शुक्रबार आयोजित पत्रकार सम्मेलनमार्फत सार्वजनिक गरिएको हो ।

सशस्त्र प्रहरी बलका सूचना अधिकारी तथा प्रवक्ता डीआईजी मनिष थापाका अनुसार निर्वाचनको संवेदनशीलता, जनघनत्व, सम्भावित जोखिम क्षेत्र, निर्वाचन केन्द्र तथा मतदान स्थलको अवस्थालाई ध्यानमा राखी विस्तृत नक्सांकन (म्यापिङ) गरिएको छ ।

यसले सुरक्षा परिचालनलाई अधिक प्रभावकारी र लक्ष्यित बनाउने अपेक्षा गरिएको छ । नीति अनुसार, निर्वाचनको पहिलो सुरक्षा घेरा नेपाल प्रहरी रहँदा सशस्त्र प्रहरी बल सुरक्षाको दोस्रो घेरामा रहनेछ । दुवै निकायबीच निरन्तर समन्वय रहने र अत्यावश्यक अवस्थामा सशस्त्र प्रहरी तत्काल बलपूर्वक परिचालित हुनसक्ने व्यवस्था गरिएको छ ।

सशस्त्र प्रहरीका अभियन्ताहरूलाई मतदानस्थलमा कुनै अप्रिय घटना हुन नदिन, भीड व्यवस्थापन, सम्भावित हिंसात्मक गतिविधि नियन्त्रण तथा संवेदनशील क्षेत्रमा मोबाइल फोर्स मार्फत सतर्कता वृद्धि गर्ने तयारी छ ।