गिरिजानन्द साह/जेठ ३१ गते। जनकपुरधाम उपमहानगरपालिका वडा न.-८ को आयोजनामा तथा नेपाल सोतोकान कराँते संघ धनुषाको सहकार्यमा १८औं राष्ट्रिय सोतोकान कराँते प्रतियोगिता सुरु भएको छ। जनकपुरधाम उप–महानगरपालिका–८ को आयोजना र नेपाल सोतोकान कराँते संघ, धनुषाको सहकार्यमा प्रतियोगिता आयोजना गरिएको हो।
धनुषा जिल्ला खेलकुद विकास समितिको कभर्ड हलमा सुरु भएको प्रतियोगितामा सातवटै प्रदेश र आयोजक टिम सहित आठ टोलीको सहभागिता छ। प्रतियोगिता तीन दिनसम्म सञ्चालन हुने आयोजकले जनाएको छ।
प्रतियोगिताको उद्घाटन कार्यक्रम जनकपुरधाम उपमहानगरपालिका वडा न.-८ का वडा अध्यक्ष दिनेश सिंहको अध्यक्षतामा सम्पन्न भयो भने कार्यक्रमका प्रमुख अतिथि मधेश प्रदेश खेलकुद परिषद्का सदस्य–सचिव शिवजी प्रसाद गुप्ता थिए। कार्यक्रममा लोसपाको संसदीय सचेतक माननीय रमिता प्रधान, नेपाल सोतोकान कराँते संघका प्रशिक्षक तथा नेपाल कराँते संघका वरिष्ठ प्रशिक्षक श्याम शेर्पा, मधेश प्रदेश खेलकुद परिषद्का सदस्य लभ कुमार अधिकारी, उद्योग वाणिज्य संघ मधेश प्रदेशका वरिष्ठ उपाध्यक्ष जितेन्द्र महासेठ, विभिन्न वडाका अध्यक्षहरू, कराँते खेलाडी, सञ्चारकर्मी तथा खेलप्रेमी दर्शकहरूको उल्लेखनीय उपस्थिति रहेको थियो।
आयोजकका अनुसार प्रतियोगितामा नेपालका विभिन्न जिल्ला तथा प्रदेशबाट कराँते खेलाडीहरू सहभागी भएका छन्। प्रतियोगिताको माध्यमबाट स्थानीय तथा राष्ट्रिय स्तरका नयाँ प्रतिभा पहिचान गरिने आयोजकको विश्वास छ। उद्घाटन समारोहमा प्रमुख अतिथि शिवजी प्रसाद गुप्ताले मधेश प्रदेशलाई खेलकुद क्षेत्रको ‘हब’ बनाउने योजना रहेको उल्लेख गर्दै भने, “मधेशमा खेलाडीको प्रतिभा प्रशस्त छ। आवश्यक पूर्वाधार र सहयोगका माध्यमबाट यसलाई राष्ट्रिय तथा अन्तर्राष्ट्रिय स्तरसम्म पुर्याउन सकिन्छ।”
विशिष्ट अतिथि माननीय रमिता प्रधानले खेलकुदलाई जीवनको मूल मन्त्रको रूपमा उल्लेख गर्दै भनिन्, “खेलले शरीर तन्दुरुस्त बनाउँछ र युवा पुस्तालाई नकारात्मक क्रियाकलापबाट टाढा राख्छ। यस्तो आयोजनाले समाजमा सकारात्मक सन्देश दिन्छ।” जनकपुरधाम उपमहानगरपालिका वडा न.-८ का वडा अध्यक्ष तथा उद्घाटन समारोह अध्यक्ष दिनेश सिंहले राज्यले खेल र खेलाडीप्रतिको मनोबल बढाउनुपर्ने आवश्यकता औँल्याउँदै भने, “खेलकुदले समाजमा अनुशासन, आत्मविश्वास र राष्ट्रिय गौरव बढाउँछ। प्रतियोगिताको समापन कार्यक्रममा उत्कृष्ट खेलाडीहरूलाई ट्रफी, प्रमाणपत्र तथा पुरस्कार प्रदान गरिनेछ। आयोजकले प्रतियोगिता सफल पार्न जनशक्ति, सुरक्षाकर्मी, स्वयंसेवक, सञ्चारकर्मी र स्थानीय समुदायको सक्रिय सहयोगको प्रशंसा गरेका छन्।
Discussion about this post