गिरिजानन्द साह/जनकपुरधाम/फागुन १४ गते। जनकपुरधाममा आयोजना हुन लागेको जनकपुर अन्तर्राष्ट्रिय फिल्म महोत्सवको तयारी पूरा भएको छ। महोत्सवका आयोजक संस्था संवाद फाउण्डेशनले बुधवार पत्रकार सम्मेलनमार्फत महोत्सवको तयारी सकिएको जानकारी दिएको हो।
संवाद फाउण्डेशनका अध्यक्ष कुमार भास्करका अनुसार फिल्म साक्षरताको प्रवद्र्धन, चलचित्रलाई प्रभावशाली सञ्चार माध्ययमको रूपमा चिनाउन, नेपाली युवालाई प्रेरणा र अवसर प्रदान गर्न तथा फिल्म निर्माता एवम् कलाकारबीच अनुभव आदान-प्रदानको अवसर सिर्जना गर्ने उद्देश्यले महोत्सव आयोजना गरिएको हो।
अध्यक्ष भास्करले भने, “स्थानीय र विश्व सिनेमा बीचको सेतु निर्माण गर्न महोत्सवले नेपाली चलचित्रलाई अन्तर्राष्ट्रिय दर्शकसम्म पुर्याउनेछ। साथै, अन्य देशका चलचित्र र कथाहरूसँग गहिरो सम्बन्ध जोड्नेछ। यसले नेपाल र अन्तर्राष्ट्रिय समुदायबीचको सांस्कृतिक सहकार्य तथा सामिप्यता बढाउनेछ।”
महोत्सवमा विभिन्न १४४ भन्दा बढी देशका चलचित्रकर्मीहरूबाट ३,५०० भन्दा बढी आवेदन प्राप्त भएको जानकारी दिँदै अध्यक्ष भास्करले कुल ७८ वटा फिल्म १० विधाबाट छनोट गरी प्रदर्शन गरिने बताए। प्रत्येक विधामा सर्वोत्कृष्ट हुनेलाई पुरस्कृत गरिने पनि उनले जानकारी दिए।
फागुन १६ देखि १८ गतेसम्म मैथिली विकास कोषको सभा भवनमा आयोजना हुन लागेको यो महोत्सव नेपाली चलचित्र क्षेत्रका लागि महत्वपूर्ण मानिएको छ।
Discussion about this post