काठमाडौँ/बैशाख २३ गते।आंशिक शिक्षक ललित विष्टले हेलमेट बजार्दै त्रिभुवन विश्वविद्यालयको समाजशास्त्र केन्द्रीय विभागका प्रमुख डा. युवराज लुइँटेलको कार्यकक्षमा तो डफोड गरेका छन्।
आफ्नो कक्षाको समयमा पढाउनसमेत नगइ विभागीय प्रमुख लुइँटेलको कार्यकक्षमा गएर १३ वैशाखमा तोडफोडमा उत्रिएको भन्दै जिल्ला प्रहरी परिसर, काठमाडौँमा विष्टविरुद्ध किटानी जाहेरी दर्ता भएको छ।
विभागको तर्फबाट आएको जाहेरी दर्ता गरेर अनुसन्धान सुरु भएको जिल्ला प्रहरी परिसर, काठमाडौंका एसपी सीताराम रिजालले बताएका छन्।
समाजशास्त्र विभागका प्राध्यापकहरुका अनुसार विष्टले १३ वैशाखको अपराह्न करिब १२:४० देखि २:२० बजेको समयमा अभद्र व्यवहार गरेका थिए। सीसी क्यामराको दृश्यमा शिक्षक विष्टले विभागीय प्रमुख लुइँटेलतिर लक्षित गरेर अपशब्द बोल्दै हेलमेट बजारेको देख्न सकिन्छ। तनावको स्थिति सिर्जना भएपछि त्यहाँ उपस्थित एक जना विद्यार्थीले उनलाई रोक्ने प्रयाससमेत गरेको देखिन्छ।
शिक्षक विष्टले एकतर्फी अपशब्द बोलिरहँदा विभागीय प्रमुख लुइँटेलले ‘के बोल्नुभएको यस्तो’ भन्दै प्रश्न गरेको सुनिन्छ। तर, उनले ‘कुर्सीमा बसेर हावा कुरा गर्ने’ भन्दै सोफामा चढेर तोडफोडमा उत्रिएको भिडियोमा देखिएको छ।
विभागीय प्रमुख लुइँटेलका अनुसार विष्टले आफूलाई समाजशास्त्र केन्द्रीय विभागको करार शिक्षकमा नियुक्त गर्नुपर्छ भन्दै पटकपटक दबाब दिँदै आएका थिए। घटनापछि प्रहरी वृत्त, कीर्तिपुरको टोलीसमेत समाजशास्त्र विभाग प्रमुखको कार्यकक्षमा पुगेको थियो।
जिल्ला प्रहरी परिसर, काठमाडौँका प्रमुख एसएसपी दानबहादुर कार्कीसँग छलफल भएपछि टेकुमा जाहेरी दर्ता भएको थियो। समाजशास्त्र विभागका प्राध्यापकहरुका अनुसार आवश्यकताका आधारमा आंशिक शिक्षकहरुलाई करारमा लैजान मिल्ने गरी केही अघि आंशिक शिक्षक व्यवस्थापन कार्यविधि बनेको थियो।
त्यही अनुसार अहिले तीन जना शिक्षकलाई करारमा लैजाने प्रक्रिया सुरु भएको थियो। विभागीय प्रमुख लुइँटेलका अनुसार कार्यविधिअनुसार करारमा लैजानका लागि सुरुमा केन्द्रीय विभागबाट स्वीकृति लिनुपर्छ। त्यसका लागि त्रिवि रजिष्टारको कार्यालयमा स्वीकृतिका लागि निवेदन पठाइएको थियो। तर, स्वीकृति आउनुअघि शिक्षक विष्टले यो विषयलाई लिएर विभागीय प्रमुख लुइँटेलको कार्यकक्षमा दुर्व्यवहार गरेको प्रहरीले जनाएको छ।
प्राध्यापकहरुका अनुसार हाल विभागमा ५ जना आंशिक शिक्षक छन्। आंशिक शिक्षक व्यवस्थापन कार्यविधिमा ज्येष्ठता, निरन्तरता, औचित्यता, आश्यकता र स्रोतको उपलब्धताको आधारमा विभागले केन्द्रसँग स्वीकृत लिएर करारमा नियुक्त गर्नसक्ने उल्लेख छ।
कतिपय प्राध्यापकहरुले उनले राजनीतिक भागबण्डाको आधारमा करारमा नियुक्ति गर्नुपर्ने माग गर्ने गरेको बताएका छन्। यसैबीच, जिल्ला प्रहरी परिसर, काठमाडौँमा पुगेर समाजशास्त्र विभागका प्राध्यापकहरुले त्रिभुवन विश्वविद्यालयमा कार्यरत रहँदा न्यूनतम सुरक्षाको प्रत्याभूति गराइदिन माग गरेका छन्।
Discussion about this post