बैशाख ९ गते । ईस्लाम धर्मावलम्वीको महान पर्व ‘इदुलफित्र’ आज हुने भएको छ । यो पर्वका लागि मुसलमानले एक महिना ब्रत बसेका थिए । जसलाई ‘रोजा’ भनिन्छ ।
एक महिनासम्म चल्ने ‘रमजान’ पर्वमा मुुसलमान दिनमा निराहार बस्छन् । बिहानको समय ३ः२० मिनेटमा ‘सेहरी’ हलुका खानेकुरा खाएर दिनभर निराहर बस्ने मुसलमान ब्रतालु सूर्यास्त भएपछि ‘एफतार’ मिठो खानेकुरा खाएर रोजा खोल्ने चलन रहेको छ ।
रमजान उर्दू क्यालेण्डरअनुसार हिजरी सम्बत् १४४४ हो भने रमजान महिना नवौँ महिना हो । रमजान महिनामा नै मुसलमानको सबैभन्दा ठूलो ग्रन्थ कुरान अवतरण भएको हो भने यो महिनामा अल्लाहको कृतज्ञता प्राप्त हुने विश्वास लिएको छ ।
दान दिनु गरिब र दीन दुःखीलाई सेवा गर्नु, जकात निकाल्नु यो महिनाको ठूलो विशेषता हो । रमजानामा ब्रत बस्ने आज साँझ पश्चिम दिशामा आकाश हेरेर चन्द्रमा हेर्ने र चन्द्रमा नजर आएमा अत्यधिक खुशी हुने र एकआपसमा इदमुबारक बधाई सटासाट गर्ने प्रचलन रहँदै आएको छ ।
रमजान महिना मुसलमानका लागि निकै महत्वपूर्ण एवं पवित्र हो र यसमा मुसलमानका पाँच आधार स्तम्भमा हज बाहेक सबै स्तम्भ पूरा हुने गर्दछ । इदुलफित्र मनाउनका लागि भोलि मुसलमान ‘इदगाह’ वा ‘मस्जिद’मा भेला भएर सामूहिकरुपमा नमाज पढ्ने गर्दछन् । इदुलफित्र मनाउनका लागि मुसलमान आज बिहानैदेखि तयारीमा जुटेको पाइएका छन् ।
मधेश प्रदेशका मुख्यमन्त्री सरोजकुमार यादवले मुस्लिम धर्मावलम्बीहरुको महान पर्व ईद–उल–फित्र (रमजान)को अवसरमा शुभकामना सन्देश दिएका छन् ।
मुख्यमन्त्री सचिवालयद्वारा शुक्रबार जारी गरिएको शुभकामना सन्देशमा रमजानमा एक महिनाको कठोर व्रतपछि मनाइने महान पर्व ईद–उल– फित्रको उपलक्ष्यमा मधेश प्रदे शसहित देशका सम्पूर्ण मुस्लिम दाजुभाई,दिदीबहिनीहरुमा हार्दिक मंगलमय शुभकामना व्यक्त गर्न चाहन्छु उल्लेख छ । प्रेम र भाईचाराको प्रतीक यो अनुकरणीय पर्व ईद मनाइराख्दा हरेक चाहना पूरा होस्,हरेक दुआ कबूल होस्,परिवारमा सुख, शान्ति, खुशियाली छाओस्,भातृत्व र सद्भाव बढाउने यो पर्वले समृद्धिको थप बाटो खोलोस् भन्ने शुभकामना सन्देश दिँदै ईद मुबारक व्यक्त गरिएको छ ।
Discussion about this post