वडा न.- १४ पुग्यो यूरो पेन्टस वडा कप २०८२ को फाईनलमा

धनुषा/चैत १९ गते। जनकपुरधाममा जारी वडा स्तरीय यूरो पेन्टस वडा कप २०८२ क्रिकेट प्रतियोगिता अन्तर्गतको सेमीफाइनल खेलमा वडा नं. १४ ले उत्कृष्ट प्रदर्शन गर्दै जितका साथ फाइनलमा स्थान सुरक्षित गरेको छ। निकै प्रतिस्पर्धात्मक र रोमाञ्चक बनेको खेलमा वार्ड नं. १९ लाई ५ विकेटले पराजित गर्दै वार्ड १४ उपाधि नजिक पुगेको हो।

टसपछी पहिले ब्याटिङ गरेको वडा नं. १९ ले निर्धारित १६ ओभरमा ८ विकेट गुमाउँदै ९३ रनको योगफल तयार पारेको थियो। टोलीका लागि अनिल यादवले अविजित ३६ रन बनाएर इनिङ्स सम्हालेका थिए भने साजनले २४ रनको योगदान दिए। अन्य ब्याट्सम्यान भने खासै चल्न सकेनन्। वडा न.- १४ का बलरहरूले अनुशासित बलिङ गर्दै नियमित अन्तरालमा विकेट लिँदा वार्ड १९ ठूलो स्कोर बनाउन असफल रह्यो।

९४ रनको लक्ष्य पछ्याएको वडा नं. १४ ले सुरुवातमा केही विकेट गुमाए पनि पछि उत्कृष्ट साझेदारी गर्दै खेल आफ्नो पक्षमा पारेको थियो। रुपेश यादवले आक्रामक ३६ रनको पारी खेलेर टिमलाई मजबुत अवस्थामा पुर्‍याए।

त्यसपछि कृष मोहन साहले संयमित र जिम्मेवार ब्याटिङ गर्दै टोलीलाई जितको लक्ष्यसम्म पुर्‍याए। उनले दबाबपूर्ण अवस्थामा उत्कृष्ट खेल प्रदर्शन गर्दै अन्त्यसम्म टिकेर टिमलाई जित दिलाए।

उत्कृष्ट प्रदर्शनका लागि कृष मोहन साहलाई म्यान अफ द म्याच घोषित गरिएको थियो। उनले निर्णायक समयमा खेल्दै टिमलाई जित दिलाउन महत्वपूर्ण भूमिका खेले। उक्त पुरस्कार उदय यादवद्वारा प्रदान गरिएको थियो।

यस जितसँगै वडा नं. १४ प्रतियोगिताको फाइनलमा प्रवेश गरेको छ। अब फाइनल खेल भोलि शनिबार दिउँसो १२:४५ बजे हुने तय गरिएको छ, जहाँ उपाधिका लागि रोमाञ्चक भिडन्त हुने अपेक्षा गरिएको छ।

प्रतियोगिताको समापन कार्यक्रम जनकपुरधाम उपमहानगरपालिकाका नगर प्रमुख मनोज कुमार साहको प्रमुख आतिथ्यतामा सम्पन्न हुने आयोजकले जनाएको छ। कार्यक्रममा खेलाडी, समर्थक तथा स्थानीय खेलप्रेमीहरूको उल्लेख्य उपस्थिति रहने अपेक्षा गरिएको छ। प्रतियोगिता अन्तिम चरणमा प्रवेश गरेसँगै जनकपुरधामका क्रिकेट प्रेमीहरूमा उत्साह झनै बढेको छ।

प्रतियोगितामा जम्मा १८ वटा वडाको टीम ले भाग लिएका थिए । यस वडा कपको डाइरेक्टर हरी शंकर साह,एड्मिनिस्ट्रेटर अम्भु प्रसाद साह, डेन्टल पार्टनर र को स्पोनसर गिता आस्पीरेशन प्रा.लि.देवी चोक,मेडिकल पार्टनर ओम फिजियो थेरापी,टाईटल स्पोन्सर युरो पेन्टस,मिडिया कोर्डिनेटर सजिलो पोस्ट,स्पोर्ट्स पार्ट्नर हरीस स्पोर्ट्स जोन,स्पोर्टिङ्ग क्लब श्री राजदेवी युवा कमिटी र न्यु भिजन नेपाल रहेको छ। वडा कपको संयोजक अरविन्दका अनुसार प्रतियोगिता नक आउट प्रणालीमा खेलाइदै छ भने खेलमा सेतो लेदर बल बाट भईरहेको छ । खेलका सम्पूर्ण नियमहरू अन्तर्राष्ट्रिय क्रिकेट परिषद् (ICC) का प्रचलित मापदण्ड अनुसार रहेको जानकारी संयोजक प्रशान्त अरविन्दले दिएको छ।