धनुषा/असोज २८ गते। अविरल वर्षाले धनुषाको बटेश्वर गाउँपालिका–४ स्थित शान्तिपुर र महेन्द्रनगर जोड्ने पुलनजिकको सडक कटान भई आवागमन अवरुद्ध भएपछि पूर्व उपप्रधानमन्त्री तथा नेकपा एमालेका वरिष्ठ नेता रघुवीर महासेठले सोमबार उक्त क्षेत्रको स्थलगत निरीक्षण गर्नुभएको छ ।
निरीक्षणका क्रममा महासेठले सडक कटानका कारण स्थानीय बासिन्दा दैनिक आवतजावतमा सास्ती खेपिरहेको देखेर तत्काल मर्मत–पुनर्निर्माण कार्य तीव्र गतिमा अघि बढाउन सम्बन्धित निकायका अधिकारीहरूलाई निर्देशन दिनुभएको हो । उहाँले भन्नुभयो, “जनताको दुःख बुझ्ने सरकार र जनप्रतिनिधिको पहिलो जिम्मेवारी समस्या समाधान हो, ढिलाइ अस्वीकार्य छ।”
सडक कटानका कारण बटेश्वर र महेन्द्रनगरबीचको सम्पर्क पूर्णरूपमा विच्छेद भएको र सवारीसाधन चल्न नसक्दा विद्यालय, बजार र स्वास्थ्य सेवामा समेत असर परेको स्थानीयले गुनासो गरेका छन् ।
शान्तिपुर–महेन्द्रनगर जोड्ने उक्त पुल पूर्व उपप्रधानमन्त्री महासेठकै पहल र योजना अनुसार निर्माण भएको हो । यस पुलले बटेश्वर क्षेत्रका हजारौँ जनताको दैनिक जीवन सहज बनाएको थियो । हालको क्षति मर्मत भएपछि पुनः सुचारु हुने विश्वास स्थानीयमा देखिएको छ । स्थानीय बासिन्दाले जनताको समस्यामा प्रतिक्रिया दिँदै स्थलगत निरीक्षणमा आउनु भएकामा उहाँप्रति आभार व्यक्त गरेका छन् ।
Discussion about this post