जनकपुरधाममा एकिकृत शैक्षिक सूचना व्यवस्थापन प्रणाली सम्बन्धि ३ दिने क्षमता अभिवृद्धि तालिम सम्पन्न

जनकपुरधाम/जेठ २ गते। एकिकृत शैक्षिक सूचना व्यवस्थापन प्रणाली (EMIS) सम्बन्धि तीन दिने क्षमता अभिवृद्धि तालिम जनकपुरधाममा सफलता पूर्वक सम्पन्न भएको छ। तालिम बैशाख ३१ गते देखि जेठ २ गतेसम्म सञ्चालन भएको थियो।

उक्त तालिमको औपचारिक उद्घाटन बैशाख ३१ गते शिक्षा विकास निर्देशनालयका निर्देशक महेन्द्र महतोको प्रमुख आतिथ्यमा सम्पन्न भयो। उद्घाटन सत्रको अध्यक्षता NCE Nepal मधेश प्रदेशका संयोजक लक्ष्मेश्वर मण्डलले गर्नुभएको थियो।

कार्यक्रममा शिक्षा तथा मानव स्रोत विकास केन्द्र (CEHRD) अन्तर्गत EMIS शाखाका निर्देशक भक्त बहादुर गोडार, शिक्षा, विज्ञान तथा प्रविधि मन्त्रालयका स्वकीय सचिव प्रवीण भट्टराई, CEHRD का तथ्यांक निर्देशक सुशील पौडेल, मधेश प्रदेशको शिक्षा तथा संस्कृति मन्त्रालयका शाखा अधिकृत दिलिप मुखिया, र ग्लोबल एक्शन नेपालका कार्यक्रम निर्देशक कृष्ण बैजु लगायतका विशिष्ट व्यक्तिहरूको उपस्थिति रहेको थियो।

तालिममा मधेश प्रदेशका विभिन्न स्थानीय तह, विद्यालय व्यवस्थापन समिति, प्रधानाध्यापकहरू, EMIS फोकल पर्सनहरू, अभिभावक प्रतिनिधिहरू, नागरिक समाज, र पत्रकार लगायत विभिन्न सरोकारवालाहरूको उल्लेखनीय सहभागिता रहेको थियो। तालिमले शिक्षा प्रणालीमा प्रविधिको उपयोग र सूचना व्यवस्थापन प्रणालीलाई एकीकृत रूपमा सञ्चालन गर्नुपर्ने आवश्यकता र औचित्यमाथि गहिरो छलफल गर्यो।

शिक्षा विकास निर्देशनालयका निर्देशक महेन्द्र महतोले उद्घाटन मन्तव्यमा शैक्षिक सूचना प्रणालीलाई समृद्ध बनाउन स्थानीय तहदेखि केन्द्रसम्मको समन्वय आवश्यक रहेको बताउनु भयो। मधेश प्रदेशका शिक्षा तथा संस्कृति मन्त्रालयका शाखा अधिकृत दिलिप मुखियाले पनि तालिमको उद्देश्य र प्रभावबारे प्रकाश पार्दै नीति निर्माणमा सूचना प्रणालीको भूमिकालाई जोड दिनुभयो।

यो तालिमको उद्देश्य सहभागीहरूलाई EMIS प्रणालीको प्रयोग, सञ्चालन, डाटा संकलन, विश्लेषण तथा प्रयोगात्मक सीपमा दक्ष बनाउनु थियो। तालिममा प्रविधि अनुकूलता, डाटा व्यवस्थापन, सूचना पारदर्शिता, र शैक्षिक योजना निर्माणमा EMIS को भूमिकाबारे व्यावहारिक प्रशिक्षण दिइएको थियो।

तीन दिनसम्म चलेको यस तालिमले स्थानीय तहका शिक्षा क्षेत्रका कर्मचारीहरूलाई सूचना प्रवाह, डाटा विश्लेषण र शैक्षिक निर्णय प्रक्रियामा प्रविधि उपयोग सम्बन्धि महत्वपूर्ण ज्ञान र सीप प्रदान गरेको छ। सहभागीहरूले तालिमबाट प्राप्त ज्ञानलाई आफ्नो कार्यक्षेत्रमा व्यवहारमा उतार्ने प्रतिबद्धता जनाएका छन्।