चीनमा कोरोना बारे समाचार लेख्ने पत्रकारलाई पाँच बर्षको जेल सजाय

एजेन्सी।चीनले कोरोना भाइरसबारे समाचार लेख्ने एक पत्रकारलाई पाँच वर्ष जेल सजाय दिने भएकाे छ। ३७ वर्षीय पूर्व वकिल समेत रहेकी झाङ झानलाई गत मे देखि प्रहरीले नियन्त्रणमा लिएको बिबिसीले जनाएको छ।

सार्वजनिक भएका केही कागजात अनुसार उनलाई पाँच वर्षसम्मको जेल सजाय दिन लागेको हो। 

उनीमाथि झगडा गराएको र समस्या उत्पन्न हुने गरी भड्काएको आरोप लगाइएको छ। चीनले यस्तो मुद्दा विशेष गरी चिनियाँ अभियन्ताहरूमाथि लगाउने गरेको छ। 

यसरी चीनले वुहानमा देखिएको करोना भाइरसबारे रिपोर्टिङ गर्ने झाङलाई मात्रै नियन्त्रणमा लिएको भने होइन।

गत फेब्रुअरी देखि कम्तिमा पनि तीन जना पत्रकार बेपत्ता भएका छन्। तीमध्ये एक ली जिहुवा गत अप्रिलमा फेला परेका थिए। उनले आफू क्वारेन्टिनमा बसेको जानकारी गराएका थिए।

त्यस्तै दोस्रो पत्रकार चेन कुइशीलाई सरकारको निगरानीमा राखिएको खुलेको थियो। तर तेस्रो पत्रकार फाङ विन भने अझै बेपत्ता छन्। 

सार्वजनिक भएको अभियोगपत्र अनुसार पत्रकार झाङ गत फेब्रुअरीमा कोरोना भाइरस सम्बन्धी रिपोर्टिङ गर्न वुहान पुगेकी थिइन्। जहाँ उनले विभिन्न मुद्दामा समाचार लेखेकी थिइन्।

नेटवर्क अफ चाइनिज ह्युमन राइटस् डिफेन्डर्स (सिएचआरडी)का अनुसार पत्रकारहरूलाई पक्राउ गरेको र उनीहरूका परिवारमाथि भएको दुर्व्यवहारबारे उनले समाचार लेखेकी थिइन्।

तर गत मे १४ मा उनी वुहानबाट बेपत्ता भएकी थिइन्।

एक दिनपछि उनलाई साङ्घाइको प्रहरीले नियन्त्रणमा लिएको खुलेको हो। जुन वुहानबाट ६ सय ४० किलोमिटर टाढा छ।

गत जुन १९ मा भने उनलाई आधिकारिक रूपमा साङ्घाइबाट पक्राउ गरिएको थियो। त्यसको झन्डै तीन महिनापछि मात्रै वकिललाई उनीसँग भेट्न अनुमति दिइएको बिबिसीले जनाएको छ।

सिएचआरडीका अनुसार पक्राउविरूद्ध पत्रकार झाङ अनशन समेत बसेकी थिइन्।

सेप्टेम्बर १८ गते उनका वकिलले उनीमाथि अभियोग लगाएकोबारे फोनमार्फत जानकारी पाएका थिए।

यद्यपि गत शुक्रबारमात्रै उनीमाथि मुद्दा चलाइएको थियो। 

सोमबार सार्वजनिक भएको अभियोग पत्रमा उनीमाथि ‘लेख, भिडिओ र अरू मिडियाका माध्यम विच्याट, ट्वीटर र युट्युब लगायतबाट गलत सूचना फैलाएको’ आरोप लगाइएको छ।

त्यस्तै उनीमाथि ‘द्वेषपूर्ण रूपमा’ वुहानमा भाइरस फैलिएकोबारे विदेशी मिडियालाई अन्तर्वार्ता दिएको पनि आरोप लगाइएको छ। 

उनलाई चार देखि पाँच वर्षको सजाय दिन सुझाव दिइएको छ।

झाङलाई त्यसरी चिनियाँ प्रहरी तथा अधिकारीहरूले दुख दिएको पहिलो पटक भने होइन।

सिएचआरडीका अनुसार सन् २०१९ सेप्टेम्बरमा साङ्घाइ प्रहरीले उनलाई बोलाएको थियो। हङकङका अभियन्ताहरूबारे समाचार लेखेपछि प्रहरीले उनलाई बोलाएको थियो।

त्यतिबेला प्रहरीले उनलाई नियन्त्रणमा लिँदा जबरजस्ती मनोचिकित्सकसँग जाँच गर्न लगाएका थिए।