सिरहामा २ वटा मोटरसाइकल एक आपसमा ठोक्किदा दुवै मोटरसाइकल चालकको मृत्यु

सिरहा। सिरहाको सिरहा–चौहर्वा सडक खण्डमा दुई वटा मोटरसाइकल आपसमा ठोक्किँदा दुई जनाको मृत्यु भएको छ ।सिरहा नगरपालिका ११ मा पर्ने भलुवाही र पदमपुरको बीचमा सिरहा–चौहर्वा सडक खण्डमा सिरहाबाट चोहर्वातर्फ जाँदै गरेको स ४ प ४६१० नम्बरको र विपरीत दिशातर्फ जाँदै गरेको स ४ प ७९२१ नम्बरको मोटरसाइकल बुधबार राति सवा ७ बजेतिर आपसमा ठोक्किएका थिए । दुर्घटनामा दुवै मोटरसाइकल चालकको मृत्यु भएको हो ।

दुर्घटनामा सिरहा नगरपालिका ९ का सिल्टु ठाकुर र धनगढीमाई नगरपालिकाको कसहा बस्ने दिपक पजीयारको मृत्यू भएको सिरहाका प्रहरी प्रवक्ता विनोद घिमिरेले जानकारी दिएका छन।

दिपकको घटनास्थलमै मृत्यू भएको छ भेने सिल्टु ठाकुर को उपचारका लागि लहान लग्ने क्रममा मृत्यू भएको छ । मृतक दिपक धनगढीमाई नगरपालिकाको कार्यपालिका सदस्य रहेको बुझिएको छ ।

ठाकुरले चलाएको मोटरसाइकलको पछाडि सवार सिरहा नगरपालिका ९ गुलरीया बस्ने ३५ वर्षीय जितेन्द्र महरा भन्ने शिव कुमार महरा घाइते भएका छन् । उनको भुमिजा अस्पताल लहानमा उपचार भइरहेको छ । घटनाबारे अनुसन्धान भइरहेको प्रहरीले जनाएको छ ।